ياسادة ياصغار احنا وانتم انصلوا على النبي المختار ، الف صلاة ولا تكفيه نحكيلكم اليوم على خرافة  "يا بير اعطيني كرموستي" ...ثمة راجل جاع مشى شرى رطل كرموس ومشى للبيرفي  الحديقة طلع سطل ماء غسل فيه الكرموسات وفرز منهم الكبيرة الباهية حطها بحذاه على شافة البير باش ياكلها لخرى يحلي بيها فمه... هو مد ايديه باش ياخذها وهي تفلت منه وتطيح في البير ... طارتله وبقى يبكي ويقول :"يا بير اعطيني كرموستي، كان كليتها راني شبعت" هو هكاكة يطلعله من قعر البير مارد يصيح عليه ويقوله : آشنهي ها الحالة عاملها على كعبة كرموس اشتهتها مولاتي الأميرة حبلى... بره يا سيدي خوذ ها القصعة انت تقوللها اتعبى بالحاجة اللي تحب عليها وهي تتعبى ... خذا هاك الراجل القصعة وروح لداره وقال لهاك القصعة تعبي بالكسكسي واللحم ... تعبت – تعبي بالتفاح والعنب والموز ... تعبت – قالها تعبي بالمال والذهب ... تعبت ... شاخ هاك الراجل ورجعت فيه الروح ... بعد ما كان فقير استغنى هاهو عنده بنته ، تمشي تتعلم في الصنعة في دار المعلمة بعد ما كانت الميزيريا واكلتها ومصفارة ... تنفنفت ، سمنت وجرى  في وجهها الدم ... ولات تلبس مليح ... نشدتها المعلمة : "ياخي منين جاك هالخير الكل ؟" حكاتلها البنية على القصعة العجيبة قلتلها جيبهالي نشوفها.من غدوة مشات لبنية سرقت هاك القصعة وجابتهولها خذاتها المعلمة وعطتها في بلاصتها قصعة أخرى روحت بيها لدارها ... لكن هالقصعة فالصو ما تتعباش... 
رجع الراجل للبير : يشكي ويبكي "يا بير اعطيني كرموستي كان كليتها راني شبعت" عاود طلعله هاك المارد قاله :"اشني هالحالة اللي عاملها ما نا قلنالك مولاتي حبلى واشتهاتها واعطيناك قصعة عجيبة ... هيا سيدي زيد خوذ هالبهيم انت تقوله هبط المال والذهب وهو يهبطلك المال والذهب – روح الراجل بهاك البهيم فرحان هو يقوله هبط وهو يهبط ...عاود الراجل اتفرهد واتنفنف .....كي العادة حكات البنية للمعلمة والمعلمة احتالت عليها وبدلتلها البهيم ورجع الراجل للبير يبكي ويشكي ، عاود خرجله المارد وعطاه المره هاذي دبوس سحري هو يقوله "اشطح واردح يا دبوس " وهي تولي عوادة وحفلة وخدم وحشم يجرو ويجروا عليه وهو ملك زمانه ... من غدوه مشات البنية للمعلمة قالتلها آشبيك عينيك منفخة قالتلها من السهرو حكاتلها الحكاية قالتلهاجيبلي هالدبوس بنيتي نشوفه ... جابتهولها ... في الليل حبت تجربه وتسهر وتشيخ ... جبدت هاك الدبوس ... هي قالتله "اشطح واردح يا دبوس" ويخرجلها هاك المارد يصيح فيها "صار انت هي مولات العمايل " وبدا يضرب فيها بهاك الدبوس ويقوللها هيا اشطح انت واردح ورد الخير لماليه ... القصعة والبهيم !!...قاتله انردهم ،انردهم غير سيبني ....  وخرافتنا هابه هابه ... كل عام تجينا صابه...