طيبة
ما تعامل كان بالطيبة
و كان بأخلاقك رد
الي ظلمك ربي حسيبه
سبحانو ما يضيع حق حد
و رد بالك من الغيبة
راهي البيوت تهد
و ازرع من الخير صيبة
كان مش لليوم للغد
صاحب السؤ منك سيبه
و دير أصحاب لوقت الجد
و بنية حلال تكن معاك حتى في زريبة
بنات الأصول الرباية و حذاقة و القد
و ولد الحلال شي ما يعيبه
شرف و جاه و رجال أسد
لا تعاير صغير بمخه و لا كبير بشيبه
و خليك مع الناس الكل قد قد
نصرة الحق ما تكونش عليك غريبة
و اوقف فوجه الباطل سد
رد بالك تغضب صاحب ولا حبيبة
و كان صار بالسماح فيسع عد
ما اطولش على والديك الغيبة
كان خذاتك الدنيا و لازم تبعد
تفكرهم ديما بألو...
راهي الفرقة صعيبة
و كونلهم الصاحب و الضنى و السند
كون صاحب جو و ضحكتك قريبة
ما عندو ما يزيدك النكد
كل تجربة تعيشها ديرها زبيبة
تحكيها لأحفادك وقت ترتاح تولي جد
و رد بالك من الحرام راهي نار لهيبة
تلقها عند الواحد الأحد
الذيوبة كثرت و كل ذيب امضي نيبه
ما تعطيش بضهرك لا تتهد
نعديو لبعضنا يا شبيبة
تزول الخطيئة و يبقى الحب للأبد
كل حد شيطانه في جيبة
و ذنوبنا ما تتعد
الموت راهي قريبة
نتقابلو الكل عند الفرد الصمد
محمد الخامس العابد